જનની

“जननी नी जोड़ सखे,नहीं मले रे लोल,

मीठा मधु ने मीठा मेहुला रे लोल,

एथी मीठी तो मारी मात रे !

जननी नी जोड़ सखी नहीं मले रे लोल” !!!!!!

श्री खबरदार नी कविता तो आपणा ह्रदय नो आवाज छे.

माता नी खोट कोई भरपाई करी शके नहीं.

माता नो प्रेम आपनी सची दोलत छे.

माँ देवी स्वरुप छे —–

या देवी सर्व भूतेषु,शक्तिरूपेण संन्स्थिता –नमः ………

ઉપરોક્ત માહિતિ શ્રી હર્ષદ ભટ્ટ તરથી પ્રાપ્ત થઈ છે.

આ આખું ગીત નીચે પ્રમાણે છે.

જનનીની જોડ સખી! નહી જડે રે લોલ

મીઠા મધુ ને મીઠા મેહુલા રે લોલ
એથી મીઠી તે મોરી માત રે
જનનીની જોડ સખી! નહી જડે રે લોલ.

પ્રભુના એ પ્રેમતણી પૂતળી રે લોલ,
જગથી જૂદેરી એની જાત રે … જનનીની

અમીની ભરેલ એની આંખડી રે લોલ,
વ્હાલનાં ભરેલાં એના વેણ રે … જનનીની

હાથ ગૂંથેલ એના હીરના રે લોલ,
હૈયું હેમંત કેરી હેલ રે … જનનીની

દેવોને દૂધ એનાં દોહ્યલા રે લોલ,
શશીએ સિંચેલ એની સોડ્ય રે … જનનીની

જગનો આધાર એની આંગળી રે લોલ,
કાળજામાં કૈંક ભર્યા કોડ રે … જનનીની

ચિત્તડું ચડેલ એનું ચાકડે રે લોલ,
પળના બાંધેલ એના પ્રાણ રે … જનનીની

મૂંગી આશિષ ઉરે મલકતી રે લોલ,
લેતા ખૂટે ન એની લહાણ રે … જનનીની

ધરતી માતા એ હશે ધ્રૂજતી રે લોલ,
અચળા અચૂક એક માય રે … જનનીની

ગંગાનાં નીર તો વધે ઘટે રે લોલ,
સરખો એ પ્રેમનો પ્રવાહ રે … જનનીની

વરસે ઘડીક વ્યોમવાદળી રે લોલ,
માડીનો મેઘ બારે માસ રે … જનનીની

ચળતી ચંદાની દીસે ચાંદની રે લોલ,
એનો નહિ આથમે ઉજાસ રે
જનનીની જોડ સખી! નહી જડે રે લોલ.

- દામોદર ખુશાલદાસ બોટાદકર